Description

Iha loron 20 Setembru 2016, iha tuku 03.00 lokraik akontese komunidade sira hamutuk ho Xefe Suku haksesuk malu ho Administradór Postu iha Aldeia Palaca, Suku Sanirin, Postu Administrativu Balibo, Munisipiu Bobonaro. Insidente ne'e akontese bainhira komunidade balun hato'o keixa ba administradór postu Balibo kona-ba problema rai ne’ebé mak komunidade balun fa'an ba iha ema seluk hodi halo projetu, ho nune'e mak administradór postu Balibo informa ba iha xefe suku atu rezolve problema refere. Bainhira tuur hamutuk rezolve problema refere derrepente xefe suku ko’alia ho hakilar, ho nune'e grupu komunidade feto no mane inklui mós joven mane balun hamriik hodi haksesuk malu, insulta no trata ba administradór postu Balibo no komunidade balun hateten ho lian maka'as "di’ak liu rezigna-an tiha", maibé situasaun refere konsege akalma direta husi Komandante PNTL Eskuadra Batugade ho membru Polisia balun ne’ebé mak partisipa iha sorumutu refere. Impaktu husi insidente ne'e mak hanesan: parte rua seidauk di’ak malu to'o agora.